एआई सुरक्षाका लागि सँगै काम गर्दै OpenAI, Anthropic र Google, के हुँदैछ छलफल ?

ब्युरो। एआई क्षेत्रमा एकअर्कासँग प्रतिस्पर्धा गरिरहेका OpenAI, Anthropic र Google DeepMind बीच एआई सुरक्षासम्बन्धी साझा मापदण्ड बनाउने विषयमा जुलाईदेखि नै कार्यसमूह (Working Group) स्तरमा छलफल भइरहेको खबर बाहिर आएको छ।
एआई प्रणाली सार्वजनिक प्रयोगमा आउनुअघि स्वतन्त्र परीक्षण, अडिट र जोखिम मूल्याङ्कनका लागि साझा मापदण्ड बनाउने विषयमा छलफलले थप तीव्रता पाएको छ।
छलफलको सुरुवात कसरी भयो?
यी छलफलको पृष्ठभूमिमा Google DeepMind का प्रमुख डेमिस हसाबिसले जुलाई १४ मा सार्वजनिक गरेको एउटा प्रस्ताव रहेको बताइन्छ। उनले अमेरिकाको वित्तीय क्षेत्रको नियामक निकाय FINRA जस्तै ‘फ्रन्टियर एआई स्ट्यान्डर्ड्स बडी’ गठन गर्न सुझाव दिएका थिए।
यही प्रस्तावलाई आधार बनाएर तीनै कम्पनीबीच अनौपचारिक छलफल अघि बढेको खबर बाहिर आएको छ।
अमोडेईको सार्वजनिक अपिल
Anthropic का प्रमुख डारियो अमोडेईले सेप्टेम्बर १२ मा सार्वजनिक गरेको एक लेखमा एआई विकासको गति जानाजान केही हदसम्म कम गर्नुपर्ने र सुरक्षाका विषयमा थप समन्वय आवश्यक रहेको बताएका थिए। सोही लेखमा उनले एआई सुरक्षासम्बन्धी छलफलका लागि प्रतिस्पर्धा (एन्टिट्रस्ट) कानूनमा साँघुरो किसिमको छुट दिनुपर्ने माग पनि राखेका थिए।
तर, कम्पनीहरूबीचको यो छलफल अमोडेईको सार्वजनिक अपिलभन्दा धेरै अघि, जुलाईदेखि नै सुरु भइसकेको थियो।
OpenAI को धारणा
OpenAI का प्रमुख वैश्विक मामिला अधिकारी क्रिस लेहेनले आफ्नो कम्पनीले Anthropic र Google सँग विगत केही हप्तादेखि एआई सुरक्षाका विषयमा काम गरिरहेको पुष्टि गरेका छन्।
तर, उनले यस्तो सहकार्यका लागि छुट्टै एन्टिट्रस्ट छुट आवश्यक नपर्ने धारणा राखेका छन्। OpenAI का प्रमुख वैज्ञानिक याकुब पाचोकीले पनि केही बाह्य संस्थासँग ठोस सुरक्षा मापदण्डका विषयमा कुराकानी भइरहेको र आगामी महिनाहरूमा थप जानकारी दिने बताएका छन्।
फरक धारणा र अनिश्चितता
तीनै कम्पनीको सरकारी संलग्नताप्रति फरक–फरक धारणा रहेको देखिन्छ। Anthropic सरकारसँगको साझेदारीतर्फ बढी झुकेको देखिन्छ भने OpenAI स्वैच्छिक उद्योग मापदण्डमा जोड दिँदै केही राज्यस्तरीय कानूनलाई पनि समर्थन गरिरहेको छ।
अमेरिकी संघीय व्यापार आयोग (FTC) का अध्यक्ष एन्ड्रु फर्गुसनले भने एन्टिट्रस्ट छुटको मागप्रति शंका व्यक्त गरेका छन्। यद्यपि, उनले यो आफ्नो व्यक्तिगत धारणा भएको स्पष्ट पारेका छन्।
हालसम्म यी छलफलले औपचारिक साझेदारी वा नयाँ संस्था गठनको रूप लिएको छैन। सम्बन्धित कम्पनीहरूले पनि यस विषयमा औपचारिक टिप्पणी गर्न अस्वीकार गरेका छन्।
स्रोत: The Information, Bloomberg, CNN